ELAZ.İNFO xəbər verir ki, Saratov vilayəti genişmiqyaslı pilotsuz uçuş aparatlarının (PUA) hücumuna məruz qalıb. İlkin məlumatlara görə, hadisə nəticəsində 3 mülki şəxs xəsarət alıb və bir neçə mülki obyektə ciddi ziyan dəyib. Vilayət qubernatoru Roman Busargin öz “Telegram” kanalında hadisənin təfərrüatlarını paylaşaraq, bütün profil xidmətlərin gücləndirilmiş iş rejiminə keçdiyini bildirib:
PUA hücumu nəticəsində mülki obyektlərə zərər dəyib. Mütəxəssislər daxil olan bütün çağırışlara dərhal reaksiya verirlər. Hadisə yerlərində bütün profil xidmətlər çalışır. İlkin məlumatlara görə, üç nəfər yaralanıb. Onlara lazımi tibbi yardım göstərilir.
Xatırladaq ki, hadisədən bir neçə saat əvvəl Saratov vilayətində PUA təhlükəsi elan edilmişdi. Rusiya Müdafiə Nazirliyinin məlumatına görə, son üç saat ərzində ölkənin müxtəlif regionları üzərində ümumilikdə 48 Ukrayna PUA-sı vurularaq zərərsizləşdirilib.
Ekspertlərin fikrincə, mülki infrastrukturun hədəf alınması regionda gərginliyi daha da artırır və hava hücumundan müdafiə sistemlərinin fəaliyyətinin optimallaşdırılmasını tələb edir.
Ruslan MƏMMƏDOV
