Çin Avropa avtomobil bazarında Yaponiyanı geridə qoyur
ELAZ.İNFO xəbər verir ki, Çin avtomobil istehsalçıları Avropa bazarında mövqelərini sürətlə gücləndirir. Son statistik göstəricələrə əsasən, hazırda Avropa avtomobil bazarında Çin istehsalı olan avtomobillərin payı təxminən 12 faiz, Yaponiya istehsalçılarının payı isə 11 faiz təşkil edir.
Mütəxəssislərin diqqət çəkdiyi əsas məqam Çinin bu nəticəyə olduqca qısa müddətdə nail olmasıdır. Belə ki, 2020-ci ildə Çin avtomobillərinin Avropa bazarındakı payı cəmi 0,1 faiz idi. Bu isə son altı il ərzində Çin istehsalçılarının bazar payının dəfələrlə artdığını göstərir.
Analitiklərin fikrincə, Çin şirkətlərinin sürətli yüksəlişində elektrik avtomobillərinin istehsalına qoyulan iri investisiyalar, qiymət rəqabəti, texnoloji yeniliklər və istehsal gücünün artması mühüm rol oynayır. Xüsusilə elektromobil sektorunda Çin markaları Avropa bazarında daha çox alıcının diqqətini cəlb etməyə başlayıb.
Ekspertlər hesab edirlər ki, mövcud dinamika davam edərsə, yaxın illərdə Avropa avtomobil bazarında rəqabət daha da kəskinləşəcək. Bunun həm Avropa, həm də Yaponiya istehsalçıları üçün yeni çağırışlar yaradacağı bildirilir.
Bəzi iqtisadçılar Avropa İttifaqının yerli istehsalçıları qorumaq üçün gömrük rüsumlarını artırmaq və ya digər tənzimləyici tədbirlər tətbiq edə biləcəyini istisna etmirlər. Lakin belə addımların Çin bazarı ilə iqtisadi əlaqələrə necə təsir göstərəcəyi də müzakirə olunan əsas məsələlərdən biridir.
Mütəxəssislər vurğulayırlar ki, qlobal avtomobil sənayesində baş verən dəyişikliklər yaxın illərdə istehsalçılar arasında rəqabətin istiqamətini müəyyən edən əsas amillərdən biri olacaq.
Asif ŞƏFƏQQƏTOV