ELAZ.İNFO xəbər verir ki, dünyada “Mağara sahibləri” haqqında bir neçə əfsanə və yer olsa da, Naxçıvanın Culfa rayonu ərazisində yerləşən Əshabi-Kəhf mağarası öz təbiiliyi və Qurani-Kərimdəki təsvirlərə uyğunluğu ilə fərqlənir. Bu məkan min illərdir ki, sirrini qoruyub saxlayır. İnanca görə, təkallahlığa inanan bir neçə gənc və onların sadiq iti (Qitmir) zülmkar hökmdar Daqyandusun (Desius) təqiblərindən qaçaraq bu mağaraya sığınırlar. Tanrı onları burada dərin bir yuxuya verir. Quranın “Əl-Kəhf” surəsində qeyd edildiyi kimi, bu gənclər mağarada tam 309 il yatırlar. Onlar oyandıqda isə artıq bütün dünya dəyişmiş, onların inancı qalib gəlmişdi. Əshabi-Kəhfə gedən hər bir ziyarətçi orada izahı çətin olan bəzi detallarla rastlaşır. Təbii Kondisioner: Mağaranın daxilində ilin istənilən vaxtında sabit və sərin bir hava kütləsi mövcuddur. Hətta yayın ən qızmar çağında belə mağaraya daxil olduqda qəribə bir sərinkeşlik hiss olunur. Damlayan suyun sirri: Mağaranın tavanından damlayan suların müəyyən xəstəliklərə şəfa olduğu və insanların arzularının çin olmasına işarə etdiyi deyilir. Dörd künclü daşlar ərazidəki daşların quruluşu və düzülüşü sanki insan əli ilə deyil, təbiətin xüsusi bir memarlığı ilə yaradılmışdır. araşdırmalara görə, bəzi ezoterik və elmi yanaşmalar bu ərazinin güclü bir enerji mərkəzi (geomaqnit zona) olduğunu iddia edir. İnsanların burada tapdığı ruh yüksəkliyi və psixoloji rahatlıq məhz həmin enerji axını ilə əlaqələndirilir. Bəzi alpinistlər və turistlər mağara ətrafında elektron cihazların bəzən düzgün işləmədiyini, saatların geri qaldığını iddia edirlər. Bu gün Əshabi-Kəhf təkcə inanc yeri deyil, həm də böyük bir turizm mərkəzidir. Mağaraya qalxan 500-dən çox pilləkən ziyarətçilər üçün həm də fiziki və mənəvi bir sınaq yoludur. İnsanlar inanırlar ki, bu yolu ixlasla çıxan hər kəsin ruhu təmizlənir.
Ruslan MƏMMƏDOV
