Rusiya-Ukrayna müharibəsinin təsirləri sərhəd bölgələrində daha kəskin hiss olunmağa başlayıb. Strateji obyektlərə edilən hücumlar regional rəhbərliyi ən sərt təhlükəsizlik tədbirləri görməyə məcbur edir.
ELAZ.İNFO xəbər verir ki, Krasnodar diyarının qubernatoru Veniamin Kondratyevin əmri ilə aprelin 28-dən etibarən Tuapse bələdiyyə rayonunda regional səviyyəli fövqəladə vəziyyət (FV) elan edilib. Tuapse şəhərində yerləşən strateji neft emalı zavodu dron hücumuna məruz qalıb. Hücum nəticəsində zavodun infrastrukturuna ciddi ziyan dəydiyi bildirilir. Fövqəladə vəziyyət rejimi ilə əlaqədar olaraq, riskli ərazilərdə yaşayan sakinlər müvəqqəti yaşayış məntəqələrinə təxliyə ediliblər.
Kuban regional əməliyyat qrupunun məlumatına görə, qubernatorun bu qərarı əhalinin təhlükəsizliyini təmin etmək və neft emalı zavodundakı qəzanın nəticələrini aradan qaldırmaq məqsədi daşıyır.
Ekspertlər qeyd edirlər ki, Tuapse neft emalı zavodu bölgənin yanacaq təminatında açar rol oynadığı üçün bu hücum həm də ciddi iqtisadi nəticələrə səbəb ola bilər. Hazırda hadisə yerində xüsusi xidmət orqanları və xilasedicilər işləyir.
Ruslan MƏMMƏDOV