ElAZ.İNFO xəbər verir ki, Rusiyanın “Zenit” klubunda çıxış edən braziliyalı futbolçular Duqlas Santos və Luis Enrike milli komandanın düşərgəsinə vaxtında çata bilməyiblər. Buna səbəb Rusiyadan planlaşdırılan iki uçuş reysinin ləğv edilməsi olub.
Duqlas Santosun maraqlarını təmsil edən “Roc Nation Sports” agentliyi məsələ ilə bağlı rəsmi açıqlama yayıb. Agentlik bildirib ki, yaranmış problem tamamilə logistik çətinliklərlə bağlıdır və futbolçunun hazırlıq səviyyəsinə təsir etməyəcək: “Narahat olmağa heç bir əsas yoxdur. Bu, sadəcə logistikada yaranmış müvəqqəti düzəlişdir. Müştərimiz Duqlas Santos Braziliya millisinin oyunlarına tam hazır olacaq”.
Braziliya yığması hazırda ABŞ-da təlim-məşq toplanışındadır. “Sambaçılar” bu toplanış çərçivəsində iki ciddi yoldaşlıq görüşü keçirəcəklər:
Braziliya – Fransa: 26 mart; Braziliya – Xorvatiya: 1 aprel (Bakı vaxtı ilə gecə saatlarında).
Qeyd edək ki, Duqlas Santos “Zenit”in müdafiə xəttinin əsas simalarından biridir və onun milli komandaya çağırılması futbolçunun son vaxtlar nümayiş etdirdiyi yüksək performansın nəticəsidir.
Ruslan MƏMMƏDOV
