ELAZ.İNFO xəbər verir ki, Ukrayna Prezidenti Volodimir Zelenski Rusiya lideri Vladimir Putinin Pasxa atəşkəsi elan etməsindən sonra rəsmi Kiyevin də güzgüvari addımlar atmağa hazır olduğunu bildirib. Zelenski öz “Telegram” kanalında qeyd edib ki, Ukrayna tərəfi bu il Pasxa bayramı günlərində atəşkəsin tətbiq olunmasını təklif edib və buna uyğun hərəkət edəcək. “İnsanlara təhlükəsiz Pasxa lazımdır”, – deyə o vurğulayıb.
Xatırladaq ki, Vladimir Putin aprelin 11-i saat 16:00-dan aprelin 12-si günün sonuna qədər bütün cəbhə boyu atəşkəs rejimi elan edib. Rusiya qoşunlarına döyüş əməliyyatlarını dayandırmaq, lakin hər hansı təcavüzkar addımın qarşısını almaq üçün hazır vəziyyətdə durmaq tapşırılıb. Ötən il, 2025-ci ildə də Pasxa münasibətilə üçgünlük atəşkəs elan olunmuşdu.
Hər iki tərəfin atəşkəsə hazır olduğunu bəyan etməsi xüsusi hərbi əməliyyat zonasında müvəqqəti sakitliyin yaranacağına ümid verir. Bu addım ilk növbədə mülki əhalinin bayram ayinlərini təhlükəsiz yerinə yetirməsinə xidmət edir. Lakin hərbi ekspertlər qeyd edirlər ki, tərəflərin qarşılıqlı etimadı aşağı səviyyədə olduğu üçün sükut rejiminə əməl olunması prosesi beynəlxalq ictimaiyyətin diqqət mərkəzində olacaq.
Ruslan MƏMMƏDOV
