ELAZ.İNFO-nun bu günkü sayının qonağı şairə Simuzər Gülərüzdür. Şairə haqqında qısa bioqrafik məlumatı və bir neçə şeiri Sizə təqdim edirik.
Şükürova Simuzər Əlimirzə qızı (təxəllüsü GÜLƏRÜZ) 1953-cü ilin 15 dekabr tarixində Saatlı rayonunun Saracalar kəndində, dəmiryolçu ailəsində dünyaya göz açmışdır. Orta məktəbin 8-ci sinfində oxuyarkən ədəbiyyata böyük həvəs göstərmiş və şeirlər yazmaga başlamışdır.
O, 1971-ci ildə N.Tusi adına Azərbaycan Dövlət Pedaqoji İnstitutuna, Ümumitexniki fənlər və fizika ixtisası üzrə daxil olmuş və 1976-cı ildə həmin institutu müvəffəqiyyətlə başa vurmuş, ixtisası üzrə müəllimlik fəaliyyətinə başlamışdır.
Simuzər Gülərüz Azərbaycan Yazıçılar Birliyinin üzvüdür, Prezident təqaüdçüsüdür. Şairə “Gözümə deyirəm baxma yollara”, Vətən sənə can demişəm”, “Əgər sevmirsənsə çəkil yolumdan”, “Kimsəsiz eşq”, “Deyişmələr” adlı kitabların müəllifidir. Onun qələmə aldığı şeirlər bir sıra antologiyalarda, o cümlədən dövri mətbuatda- qəzet və jurnallarda mütəmadi olaraq dərc olunur.
Simuzər xanım 3 qız, 3 oğlan anasıdır.
Mərhum həyat yoldaşı Şükürov Yunsur Yusif oğlu Səmərqənd Tibb İnstitutunun məzunu olmuşdur.
QƏRƏNFİL
Dogma Azərbaycanımızın müstəqilliyinin yenidən bərpası ugrunda canından keçmiş 20 YANVAR ŞƏHİDLƏRİNİN əziz xatirəsinə həsr olunub
Şəhidın qanından, igid canından,
Günəşin odundan yaranmısan sən!
Çevrilib atəşə, dönüb alova,
Qəbirlər üstündə qalanmısan sən.
Əbədi məkanda qərar tutmusan
Nakam qərənfilim məzarlar üstə.
Oradan boylanır gənclər ahəstə
Bayatı söyləyir “Çahargah” üstə.
…Sən də ay qərənfil, layla deyirsən?
İgid şəhidlərə layla çalırsan?
-“Bəli! Şəhidlərə layla deyirəm!
Mən Şəhidlərə öz balam kimi
Layla deyirəm, layla!
ANA, MƏNİ İSTİ YERDƏ DƏFN ELƏ
Şeir bir Şəhidin dilindən yazılmışdır
Allah cəmi Şəhidlərimizə rəhmət eləsin!
Ana, məni isti yerdə dəfn elə.
Üşümüşəm orda donum açılsın.
Ana, məni yumşaq yerdə dəfn elə
Daş üstəyəm, orda yerim xoş olsun.
Ana, məni günəş kimi dəfn elə,
İşığımdan aləmə nur yayılsın.
Ana, məni gecəyarı dəfn elə,
Ay işığı məzarıma saçılsın.
Ana, məni dəfn edəndə ağlama,
Qara geyib, qara yaylıq bağlama,
Göz yaşınla ürəkləri dağlama,
Dəyanətin elə örnək sayılsın.
Ana, mənə matəm tutma, yas tutma,
Naqisləri məclislərdə oturtma.
Son arzumu, əziz anam, unutma,
Xoş xatirəm ürəklərdə anılsın!
