Milli Cəbhə Partiyasının (MCP) Salyan rayon təşkilatının sədri Ruslan Məmmədov partiya rəhbərliyinin həyata keçirdiyi sosial-siyasi layihələr və vətəndaş məmnuniyyətinə xidmət edən addımlar barədə geniş açıqlama verib.
Milli Cəbhə Partiyasının sədri, millət vəkili Razi Nurullayevin fəaliyyətində vətəndaş amili hər zaman ön planda dayanır. Bu siyasətin tərkib hissəsi olaraq, partiya rəhbərliyi tərəfindən həm fərdi müraciətlər, həm də sistematik hüquqi yardımlar yüksək səviyyədə təşkil olunub.
ELAZ.İNFO-ya danışan MCP-nın Salyan rayon təşkilatının sədri Ruslan Məmmədov bildirib ki, Razi Nurullayev İmişli rayonundan seçilmiş millət vəkili olsa da, Azərbaycanın hər bir bölgəsindən gələn müraciətləri eyni həssaslıqla qarşılayır. Salyan sakininin müraciətinə göstərilən xüsusi diqqəti şərh edən R.Məmmədov qeyd edib:
Razi müəllim üçün vətəndaşın dərdi coğrafi sərhəd tanımır. ‘Bu mənim dairəm deyil’ deyib kənara çəkilmək deyil, ‘bu mənim vətəndaşımdır’ deyib məsuliyyət götürmək əsl xalq vəkilinin işidir. Salyanlı vətəndaşı qəbul edərək, onun probleminin həlli üçün dərhal göstəriş verməsi bir daha sübut etdi ki, bizim qərargahımız hər bir Azərbaycan vətəndaşının ümid yeridir.
Həftə içi hər gün təmənnasız hüquqi yardım
Ruslan Məmmədov partiyanın daha bir önəmli fəaliyyətini xüsusi vurğulayıb. O qeyd edib ki, millət vəkili Razi Nurullayevin birbaşa tapşırığı ilə vətəndaşların hüquqi savadlılığının artırılması və qarşılaşdıqları çətinliklərin həlli məqsədilə xüsusi xidmət fəaliyyət göstərir:
Xüsusi ilə qeyd etmək istəyirəm ki, partiyamızın qərargahında həftənin 1-ci və 5-ci günləri təcrübəli hüquqşünas Vüqar Dadaşov tərəfindən vətəndaşlara tam təmənnasız hüquqi məsləhətlər verilir. Bu, sadəcə məsləhət xidməti deyil, bir çox hallarda müraciətlər yerindəcə araşdırılır və hüquqi müstəvidə həllini tapır. Bu sistematik yanaşma vətəndaş məmnuniyyətini təmin etmək üçün atılan ən real addımlardan biridir.
Siyasi məsuliyyət və vətəndaş inamı
Salyan təşkilat sədri sonda əlavə edib ki, MCP-nin bu cür fəaliyyəti cəmiyyətdə partiyaya və millət vəkilinə olan inamı daha da möhkəmləndirir. “Məqsədimiz bürokratiyanı deyil, insan amilini uca tutmaqdır. Razi Nurullayevin liderliyi altında biz bu yolu sadiqliklə davam etdirəcəyik,” – deyə Ruslan Məmmədov bildirib.
