Dünən Bakıda keçirilən Türk Dövlətləri Təşkilatına üzv ölkələrin qeyri-hökumət təşkilatlarının həmrəylik forumu təkcə bir tədbir deyil – türk dünyasında ictimai diplomatiyanın daha geniş miqyasda formalaşmasının göstəricisidir.
Prezident İlham Əliyevin forum iştirakçılarına ünvanladığı müraciətdə bir mühüm xətt aydın görünür: türk dövlətlərinin güclənən siyasi iradəsi ilə yanaşı, vətəndaş cəmiyyəti institutları da bu böyük coğrafiyanın gələcək əməkdaşlıq modelində daha fəal rol oynayacaq.
Son illərdə TDT çərçivəsində artan əlaqələr, media, QHT, humanitar və klimatik istiqamətlərdə keçirilən tədbirlər göstərir ki, region artıq təkcə dövlətlərarası münasibətlərlə kifayətlənmir; cəmiyyətlərin bir-birinə yaxınlaşması strateji prioritetə çevrilib.
Qarabağ və Şərqi Zəngəzurun bərpası, Zəngəzur dəhlizinin açılması, 2026-cı ildə Birinci Türkoloji Qurultayın 100 illiyinin qeyd olunacağı faktı – bütün bunlar QHT-lər üçün yeni əməkdaşlıq imkanları yaradır. Ən əsası, türk ölkələrinin ictimai institutlarının beynəlxalq platformalarda vahid mövqedən çıxış etməsi üçün real zəmindir.
Bu forumun Bakıda keçirilməsi həm də bir mesajdır: Türk dünyası öz inkişafında yeni mərhələyə qədəm qoyur və bu prosesdə vətəndaş cəmiyyəti artıq passiv müşahidəçi deyil, həmrəyliyin və birliyin fəal daşıyıcısıdır.
Əliməmməd NURİYEV
