ELAZ.İNFO xəbər verir ki, ABŞ prezidenti Donald Trampın administrasiyası ticarət sazişi üzrə danışıqlar və Çin sədri Si Cinpinin iştirakı ilə mümkün zirvə görüşü fonunda münasibətlərin gərginləşməsinin qarşısını almaq istəyi ilə Çinə bir sıra ciddi güzəştlərə gedib. Bu barədə “The Washington Post” (WP) öz mənbələrinə istinadən məlumat yayıb.
Qəzetin yazdığına görə, Pekinin tələbinə uyğun olaraq, ABŞ nəinki Tayvanın müdafiə naziri Qu Lixiongun (həmçinin Vellinqton Qu kimi tanınır) 2025-ci ilin iyununda səfərini təxirə salıb, həm də Tayvanın administrasiyasının rəhbəri Lai Qingdeni ABŞ-da öncədən avqust ayına planlaşdırılan dayanacaqlara da getməyi ləğv etməyə inandırıb.
Nəşrin mənbələrinin bildirdiyinə görə, Tayvan lideri Latın Amerikasına işgüzar səfəri zamanı Nyu-York və Dallasda dayanmağı planlaşdırıb. Həmsöhbətlərdən biri qeyd edib ki, Tramp administrasiyası adanın administrasiyasının rəhbərindən Amerikanın iri şəhərlərinə getməməyi xahiş edib.
WP mənbədən sitat gətirərək yazır ki, “Onlar açıq şəkildə yox demədilər, lakin [Lai Qingdenin ABŞ ərazisindəki dayanacaqlarına] o qədər məhdudiyyət qoydular ki, aydın oldu: onlar bunu istəmirlər”.
Qəzetin mənbələrindən birinin verdiyi məlumata görə, Pentaqon bu yaxınlarda Tayvana hərbi yardım göndərilməsi ilə bağlı təklifini Ağ Evə təqdim etsə də, cavab almayıb.
Qəzet qeyd edir ki, tənqidçilər Tramp administrasiyasının süni intellekt yarımkeçiricilərinin Çinə satışına qoyulan məhdudiyyətləri aradan qaldırmaq üçün atdığı addımlardan da narahat olduqlarını bildiriblər.
WP-nin qeyd etdiyi kimi, Amerika prezidentinin siyasətini tənqid edənlər arasında həm Demokratlar, həm də Respublikaçılar partiyalarının nümayəndələri, o cümlədən Trampın ilk administrasiyasından olan keçmiş ABŞ rəsmiləri var. Qəzet yazır ki, onlar Trampın Çinlə ticarət sazişi bağlamaq istəyinin administrasiyanın Pekinlə iqtisadi, texnoloji və hərbi sahədə daha qəti şəkildə rəqabət aparmaq səylərini arxa plana keçirməsindən qorxurlar.
Bir gün əvvəl Tramp Aberdindən Vaşinqtona uçan təyyarəsində jurnalistlərlə söhbət edərkən, ilin sonuna qədər Si Cinpinlə görüşməyi gözlədiyini söylədi.
ABŞ prezidenti demişdi ki, “O [Xi Jinping] görüşmək istəyir və mən də onunla görüşməyi səbirsizliklə gözləyirəm. Deyərdim ki, ilin sonuna qədər [baş tutacaq]”.
İlahə BAYINDIR
