Ağ Ev yaxınlığında Milli Qvardiya üzvünün ölümünə səbəb olan hücumdan sonra ABŞ Prezidenti Donald Tramp “bütün Üçüncü Dünya ölkələrindən immiqrasiyanı birdəfəlik dayandıracağını” -deyə açıqlayıb.
ELAZ.İNFO xəbər verir ki, bu açıqlama, cinayətkarın 2021-ci ildə ABŞ-a köçürmə proqramı vasitəsilə daxil olan Əfqanıstan vətəndaşı olduğu müəyyən edildikdən sonra immiqrasiya siyasətinin yeni bir sərtləşdirilməsini göstərir.
Tramp hansı ölkələri nəzərdə tutduğunu və ya “daimi dayandırma” dedikdə nəyi nəzərdə tutduğunu dəqiqləşdirmədi, lakin plana keçmiş prezident Co Baydenin administrasiyası dövründə təsdiq edilmiş halların daxil olacağını bildirdi.
Tramp Truth Social platformasında yazıb:
-“ABŞ sisteminin tam bərpası üçün bütün Üçüncü Dünya ölkələrindən immiqrasiyanı birdəfəlik dayandıracağam. Bayden administrasiyası dövründə edilən milyonlarla qanunsuz qəbula son qoyacağam, Co Baydenin avtomatik imzası ilə təsdiqlənmişlər də daxil olmaqla hamısını ləğv edəcəyəm və ABŞ üçün heç bir dəyəri olmayan hər kəsi deportasiya edəcəyəm.”
Tramp həmçinin bildirib ki, “qeyri-vətəndaşlar” üçün bütün federal yardım və subsidiyalar dayandırılacaq, sülhü pozan immiqrantlar vətəndaşlıqdan məhrum edilə biləcəklər və təhlükəsizlik riski və ya “Qərb sivilizasiyası ilə uyğun olmayan” hesab edilən xarici vətəndaşlar deportasiya ediləcəklər.
HÜCUMLARDAN SONRA İMMİQRASİYA QAYDALARI SÜRƏTLƏNDİRİLİB
Trampın açıqlamaları pusquda öldürülən 20 yaşlı Milli Qvardiya əsgəri Sara Bekstromun ölümündən sonra verilib. Tramp həmçinin hücumda yaralanan Endryu Vulfun “həyatı uğrunda mübarizə apardığını” bildirib.
Rəsmilər Trampın Bayden administrasiyası dövründə təsdiqlənmiş sığınacaq müraciətlərinin və 19 ölkənin vətəndaşlarına verilən Yaşıl Kartların hərtərəfli araşdırılmasını əmr etdiyini açıqlayıblar.
Ayrı bir açıqlamada Tramp iddia edib ki, Əfqanıstandan “dəhşətli” hava daşınması zamanı yüz minlərlə insan ABŞ-a tamamilə “yoxlanılmadan və sorğu-sualsız” daxil olub.
ABŞ İmmiqrasiya və Naturalizasiya Xidmətləri Əfqanıstan vətəndaşları üçün bütün müraciətlərin işlənməsini qeyri-müəyyən müddətə dayandırıb.
İlahə BAYINDIR
