Bakının Nərimanov rayonu, xalq arasında “Dərnəgül yolu” kimi tanınan Ziya Bünyadov prospekti yaxınlığında yerləşən sənaye obyektlərindən birində güclü yanğın başlayıb.
ELAZ.İNFO xəbər verir ki, hadisə yerinə çox sayda yanğınsöndürən briqadası cəlb olunub. İlkin məlumatlara görə, yanğın tikinti materialları və ya mebel istehsalı sexlərindən birində qeydə alınıb. Ərazidə tezalışan maddələrin çoxluğu alovun sürətlə yayılmasına səbəb olub. Şahidlərin verdiyi məlumata görə, qatı qara tüstü şəhərin bir çox hissəsindən aydın görünür.
Fövqəladə Hallar Nazirliyinin (FHN) Dövlət Yanğından Mühafizə Xidmətinin yanğınsöndürmə briqadaları hazırda alovun lokallaşdırılması və qonşu obyektlərə keçməməsi üçün mübarizə aparır. Hadisə yerinə Təcili Tibbi Yardım və polis əməkdaşları da cəlb edilib.
Yanğın söndürülməsi əməliyyatı və hadisəyə baxan maraqlı şəxslərin çoxluğu səbəbindən Ziya Bünyadov prospektində və “Koroğlu” metrosu istiqamətində hərəkətdə ciddi sıxlıq müşahidə olunur. Yol Polisi sürücülərə alternativ yollardan istifadə etməyi tövsiyə edir.
Hələlik xəsarət alanlar barədə rəsmi məlumat yoxdur. Yanğının başvermə səbəbləri araşdırılır.
Ruslan MƏMMƏDOV
