ELAZ.İNFO xəbər verir ki, Yaxın Şərqdə gərginlik pik həddə çatıb. İranın rəsmi dövlət televiziyasının yaydığı məlumata görə, İslam İnqilabı Keşikçiləri Korpusu (SEPAH) İsrail və ABŞ-ın hərbi obyektlərinə qarşı genişmiqyaslı raket hücumu həyata keçirdiyini elan edib.
SEPAH-ın yaydığı bəyanatda bildirilir ki, “Doğru vəd – 4” əməliyyatının 43-cü mərhələsi çərçivəsində ABŞ Hərbi Dəniz Qüvvələrinin 5-ci donanmasının bazası və bir sıra digər Amerika hərbi obyektləri hədəf alınıb. Eyni zamanda İsrailin Təl-Əviv və Eylat şəhərlərinə zərbələr endirilib.
Hücumda istifadə olunan silahlar texniki göstəriciləri ilə diqqət çəkir: “Khorramshahr” raketləri: 2 tonluq dağıdıcı döyüş başlığı ilə təchiz edilib. “Emad” və “Kheibar Shekan” raketləri: 1 tonluq döyüş başlıqları ilə hücuma cəlb olunub.
Bu hücum İranın regiondakı hərbi əməliyyatlarının növbəti mərhələsi kimi qiymətləndirilir. Rəsmi Tehran bu addımı “cavab tədbiri” adlandırsa da, hərbi ekspertlər 2 tonluq döyüş başlıqlarının istifadə edilməsini münaqişənin yeni və daha təhlükəli müstəviyə keçməsi kimi xarakterizə edirlər.
Ruslan MƏMMƏDOV
