ELAZ.İNFO xəbər verir ki, Rusiya Federasiyasının Prezidenti Vladimir Putinin Çin Xalq Respublikasına (ÇXR) nəzərdə tutulan səfərinin hazırlıqları davam edir. Rusiya Xarici İşlər Nazirliyi səfərin dəqiq tarixlərinin yaxın zamanlarda ictimaiyyətə elan ediləcəyini bəyan edib.
Rusiya Xarici İşlər nazirinin müavini Andrey Rudenko jurnalistlərə açıqlamasında bildirib ki, hazırda səfərin təfərrüatları və konkret tarixləri üzərində fəal iş gedir: Biz bu istiqamətdə işləyirik. Düşünürəm ki, ən qısa zamanda səfərin vaxtı ilə bağlı rəsmi məlumat veriləcək.
Xatırladaq ki, Vladimir Putin 2025-ci ilin avqust-sentyabr aylarında Çinə 4 günlük rəsmi səfər edib. Həmin səfər çərçivəsində Rusiya lideri Şanxay Əməkdaşlıq Təşkilatının (ŞƏT) sammitində iştirak edib və Pekində tarixi hərbi paradı izləyib. İki ölkə arasında mövcud olan strateji tərəfdaşlıq, regional və qlobal təhlükəsizlik məsələləri, o cümlədən iqtisadi əməkdaşlıq bu səfərin də əsas gündəliyini təşkil edəcək.
Analitiklər hesab edir ki, bu səfər hazırkı beynəlxalq gərginlik fonunda Rusiya və Çin arasında siyasi və iqtisadi əlaqələrin növbəti səviyyəyə qaldırılması üçün mühüm əhəmiyyət kəsb edəcək.
Ruslan MƏMMƏDOV
