ELAZ.İNFO xəbər verir ki, Krım yarımadasında yerləşən Sevastopol şəhəri növbəti dəfə intensiv hava hücumuna məruz qalıb. Ukrayna Silahlı Qüvvələrinin hücumu nəticəsində şəhərətrafı ərazidə ciddi yanğın hadisələri qeydə alınıb.
Sevastopol qubernatoru Mixail Razvojayev öz rəsmi resurslarında bildirib ki, şəhər üzərində Hava Hücumundan Müdafiə qüvvələri tərəfindən 9 hava hədəfi (raket və ya PUA) müvəffəqiyyətlə məhv edilib. Lakin hücumun fəsadları tamamilə yan keçməyib.
Hücum zamanı vurulan hədəflərin qəlpələri şəhərətrafı yaşayış massivlərinə düşüb: “Granat” bağçılıq yoldaşlığı ərazisində yerləşən tikinti materialları anbarında və bir fərdi yaşayış evində güclü yanğın başlayıb. Hazırda Fövqəladə Hallar Nazirliyinin yanğınsöndürmə briqadaları hadisə yerindədir. Zərərçəkənlər və dağıntıların miqyası barədə dəqiqləşdirmələr aparılır. Qubernator əhalini ehtiyatlı olmağa, HHM sistemlərinin işini videoya çəkməməyə və rəsmi məlumatları izləməyə çağırıb. Şəhərdə bir müddət davam edən hava həyəcanı siqnalı artıq ləğv edilib.
Ruslan MƏMMƏDOV
