ELAZ.İNFO, BAKI, 09.05.2025.
(Faşizm üzərində Qələbənin 80 illiyinə həsr olunur)
ESSE
Tarixin qanla yazılmış səhifələrindən biri – İkinci Dünya müharibəsi… O illər təkcə silahların, tankların və bombaların danışdığı illər deyildi – o illər həm də vətənə sevginin, fədakarlığın, igidliyin sınandığı dövrlər idi. 80 il ötür o qələbədən – lakin yaddaşımızda bu müharibənin izləri hələ də təzədir. Azərbaycan xalqı bu qələbənin memarlarından biri olub. Bu gün, 9 May – Faşizm üzərində Qələbə Günündə o igid oğul və qızlarımızı ehtiramla anırıq.
1941-ci il… Müharibə qapımızı döyəndə, Azərbaycan xalqı bir an belə tərəddüd etmədi. Vətən üçün döyüşmək, azadlıq uğrunda can vermək, düşmənə qarşı birləşmək – xalqın tək istəyinə çevrildi. O zaman Azərbaycanın hər dağından, hər düzündən, hər kəndindən igidlər cəbhəyə yollandı. Cəmi bir neçə ay ərzində 87 qırıcı təyyarə batalyonu, 1124 özünümüdafiə dəstəsi təşkil olundu. 600 mindən çox azərbaycanlı müharibəyə getdi – onların çoxu doğma yurdlarına dönə bilmədi, ancaq adları tarixə qəhrəman kimi yazıldı.
Azərbaycan diviziyaları Qafqazdan Berlinədək qanlı döyüş yolları keçdi. Hər kəlməsində igidlik çalarlanan bu yolları Həzi Aslanovun, İsrafil Məmmədovun, Mehdi Hüseynzadənin, Ziya Bünyadovun və yüzlərlə adsız qəhrəmanın ayaq səsləri müşayiət edirdi. Onlar təkcə düşmənlə vuruşmurdular, həm də insanlığın, azadlığın, gələcəyin naminə döyüşürdülər.
Bu müharibə yalnız ön cəbhədə getmədi. Arxa cəbhə – xalqın əsl qüdrətini nümayiş etdirdiyi, vətən sevgisinin gücünü göstərdiyi bir səhnəyə çevrildi. Bakı gecə-gündüz yandı – neft quyularında, zavodlarda, fabrikin dar zalında işıq sönmədi. Çünki bilirdilər – hər damla benzin bir tankın hərəkəti, bir təyyarənin uçuşu, bir ordunun gücü deməkdir. Azərbaycan neftçiləri SSRİ-nin neftinin 71%-ni təkbaşına hasil etdilər. Bu, sadəcə statistik rəqəm deyil – bu, Bakının vətən qarşısında boy göstərdiyi bir dağ kimi dayanan şərəfidir.
Akademik Yusif Məmmədəliyevin rəhbərliyi ilə yaradılan yeni texnologiya sayəsində hava flotu üçün yüksək keyfiyyətli benzin istehsal olundu. Bu texnoloji yenilik düşmənin cəbhəsində səssiz, lakin dağıdıcı bir silaha çevrildi. Hər beş tankdan, hər beş təyyarədən dördü Bakı benzini ilə hərəkət edirdi – bu faktın özü Azərbaycan xalqının qələbədə oynadığı rolu ucaldan simvoldur.
Qələbə günü – 1945-ci ilin 9 mayı… O gün milyonlarla insanın duaları eşidildi. Amma bu qələbənin arxasında milyonlarla şəhidin qanı, göz yaşı və fədakarlığı vardı. Azərbaycanın minlərlə ocağına qara xəbər gəlmişdi. Ana balasız, qadın ərsiz, uşaq atasız qalmışdı. Ancaq bu qurbanlar sayəsində insanlıq öz azadlığına qovuşdu.
Bu gün 80 il sonra, Prezident İlham Əliyevin imzaladığı sərəncamla müharibə iştirakçılarına və onların ailələrinə dövlətimizin diqqət və qayğısı davam edir. Qələbənin canlı şahidlərinə göstərilən hörmət xalqın tarixinə, kökünə, ruhuna ehtiramın təcəssümüdür.
Bu qələbə – təkcə faşizm üzərində deyil, həm də qorxu üzərində, ölüm üzərində, köləlik üzərində qazanılmış bir qələbə idi. Azərbaycanın o illərdəki fədakarlığı bu günümüzü var etdi. Biz indi azadıqsa, bu gün gülümsəyə biliriksə, o zaman canını fəda edənlərin sayəsindədir.
Qoy bu qələbə heç vaxt unudulmasın! Qoy hər bir nəsil bilsin – azadlıq heç vaxt asanlıqla qazanılmayıb. Azərbaycanın fədakar əlləri, igid oğulları, yorulmaz neftçiləri və polad iradəli qadınları bu azadlığın əsas sütunlarını inşa ediblər.
Əbədi yaşasın Qələbə!
Əbədi yaşasın qəhrəman Azərbaycan xalqı!
Sakit MALİKOV
