ElAZ.İNFO Ukrayna mediasına istinadən xəbər verir ki, Rusiya ordusunun son günlərdə Ukrayna ərazilərinə fasiləsiz dron hücumları təşkil etməsinin arxasında iki əsas səbəb dayanır. Hərbi ekspert Aleksandr Musiyenko bu genişmiqyaslı hava terrorunu Kreml rəhbərliyinin “isterikası” kimi qiymətləndirib.
Ekspertin fikrincə, hücumların ən mühüm səbəbi Ukraynanın Rusiyanın neft ixracatına vurduğu ağır zərbədir. Xüsusilə Rusiyanın “Primorsk” limanına edilən uğurlu hücumlar neft ixracını uzun müddətə dayandırıb. “Bu, onlara çox pis təsir edib. Ruslar neft ixracından böyük qazanc əldə etməyi planlaşdırırdılar, lakin Ukrayna bu ‘bayramı’ onlara haram etdi. İndiki hücumlar həmin zərbənin qisasıdır,” – deyə Musiyenko bildirib. Digər səbəb isə Rusiya ordusunun quruda istədiyi nəticəni əldə edə bilməməsidir. Ekspert vurğulayır ki, işğalçı qüvvələr cəbhə xəttində irəliləyə bilmir və faktiki olaraq yaz hücumu planı iflasa uğrayıb. Kreml cəbhədəki bu rüsvayçılığı dinc əhaliyə qarşı hava terroru ilə kompensasiya etməyə çalışır.
Musiyenko hücumların dəf edilməsində Ukrayna Hava Hücumundan Müdafiə (HHM) qüvvələrinin yüksək peşəkarlığını qeyd edib. O bildirib ki, Müdafiə Nazirliyinin vəd etdiyi “Hava Qübbəsi” sistemi artıq real nəticələrini verir: Dağıntıların miqyası minimuma endirilib; PUA-ların böyük əksəriyyəti hədəfə çatmadan məhv edilib; Ukraynanın qərb vilayətlərinə qədər çatan dronlar ciddi strateji uğur qazana bilməyib.
Ekspert yekunda əlavə edib ki, bu cür kütləvi dron hücumları daimi xarakter daşıya bilməz, çünki Rusiyanın resursları bu qədər böyük miqyaslı hücumları sonsuzadək davam etdirməyə yetərli deyil.
Ruslan MƏMMƏDOV
