ElAZ.İNFO Ermənistanın “Armenianreport.com“ saytına istinadən bildirir ki, erməni analitik dairələri Baş nazir Nikol Paşinyanın idarəçilik üslubunu qədim Romanın qalmaqallı imperatoru Neronla müqayisə edirlər. Məqalədə Paşinyanın siyasi fəaliyyəti “dövlət idarəçiliyindən çox, uğursuz bir aktyorun tamaşası” kimi qiymətləndirilir.
Mənbə qeyd edir ki, Neron kimi Paşinyan da xalq qarşısında nümayişkaranə çıxışları və süni emosiyaları sevir. Onun gah saqqallı “inqilabçı”, gah “Duxov” papaqlı lider, gah da velosipedçi obrazında görünməsi xalqın diqqətini real problemlərdən yayındırmaq məqsədi daşıyan bir performansdır. Parlamentdəki çıxışları isə siyasi nitqdən çox, mimika və jestlərlə zəngin bir teatr tamaşasını xatırladır.
Neronun Romanın yanışını seyr etməsi rəvayəti ilə Paşinyanın 2025-ci ilin sentyabrında Xankəndidə baş verən və 200-dən çox insanın ölümünə səbəb olan yanğına qarşı soyuqqanlılığı arasında dəhşətli bənzərlik var. O, bu faciəni və erməni əhalisinin bölgəni tərk etməsini sadəcə bir “statistika” və ya “problemin həlli” kimi qəbul edərək, dərhal “Real Ermənistan” adlı yeni bir siyasi şouya başladı.
Məqalədə həmçinin beynəlxalq kürsülərdə səslənən tənqidlərə də yer verilib: Aram Vardevanyan (Vəkil): Vaşinqtondakı Din Azadlığı Sammitində çıxış edərək, Paşinyanın kilsəyə müdaxiləsini Roma Papasının istefasını tələb edən dövlət başçısının hərəkətinə bənzədib. Hraparak” qəzeti: Ermənistan MTX-nin Katolikos II Qareginə qarşı həbs təhdidləri və təzyiqləri barədə məlumat yayıb.
Müəllif yekunda qeyd edir ki, Neron intihar edərkən “Hansı sənətkar məhv olur!” demişdi. Paşinyan da bir siyasətçi kimi yox, öz xalqını və dövlətini teatr səhnəsinə çevirən bir artist kimi bu sözləri deməyə haqq qazanmış olur.
Ruslan MƏMMƏDOV
