Qlobal iqlim dəyişikliyi ilə mübarizə və ekoloji sistemlərin qorunması istiqamətində beynəlxalq tərəfdaşlıq platformaları genişlənir. Dünyanın aparıcı fondları və ekoloji təşkilatları təbiətin bərpasını iqtisadi inkişafla əlaqələndirən yeni qlobal təşəbbüslər irəli sürürlər.
ELAZ.İNFO xəbər verir ki, “London Climate Action Week”in (London İqlim Fəaliyyəti Həftəsi) başlanğıcı münasibətilə filantropiya, impakt investisiya və dayqlıqlıq sahələrinin liderlərini bir araya gətirən dəyirmi masa və qəbul keçirilib. “Conservation International” təşkilatı ilə birgə Ağa Xan Mərkəzində təşkil olunan bu tədbir böyük marağa səbəb olub.
Ötən həftə “Our Ocean Conference”da keçirilən panel müzakirələrinə uyğun olaraq, Londondakı iki hissəli tədbir əsas bir tezisə — okeanın bərpasının yalnız ekoloji qorunma problemi deyil, həm də mühüm bir iqtisadi məsələ olmasına yönəlib. Apurva Oza, Didye Van Binyot, Meyzani İrmadhiani (“Konservasi İndoneziya”) və Yan Lesseniçin iştirak etdiyi dəyirmi masada okeanın sağlamlığı, insanların dolanışıq mənbələri və iqtisadi stimulların necə kəsişdiyi, həmçinin sınaqdan keçirilmiş həllərin geniş miqyasda reallaşdırılması üçün nələrin zəruri olduğu araşdırılıb.
100-dən çox qonağın qatıldığı rəsmi qəbul isə tərəfdaşlıq əlaqələrinin gücləndirilməsi və icmalara əsaslanan iqlim həllərinin miqyasını genişləndirmək üçün əməkdaşlıq imkanlarının müəyyənləşdirilməsinə həsr olunub. Tədbirdə “Conservation International”ın idarə heyətinin üzvü Hindu Umaru İbrahim, baş direktor Sebastyan Tronq, həmçinin şahzadə Hüseyn Ağa Xan və doktor Mett Rid giriş sözü ilə çıxış ediblər.
Tədbir zamanı Ağa Xan Fondu (AKF) Hind okeanı hövzəsini əhatə edən yeni 10 illik #ReGeneration təşəbbüsünü böyük məmnuniyyətlə elan edib. Yerli icmalar və tərəfdaşlarla birlikdə həyata keçirilən bu layihə ekosistemlərin bərpası ilə iqtisadi imkanları birləşdirməyi və insanların dolanışıq səviyyəsinin yüksəldilməsini hədəfləyir.
Ruslan MƏMMƏDOV