Güney Azərbaycan Milli Azadlıq Hərəkatında Milli Liderin Olmağının Önəmi
✍ Rıza Qaraçay
Güney Azərbaycan Türk milləti bir əsrdən artıqdır ki, fars-şovinist, molla-teokratik və anti-insani bir rejimin zülmü altında milli hüquqlarından məhrum edilmiş, mədəniyyəti, dili və siyasi varlığı sistematik olaraq məhv edilməyə çalışılmışdır. Bu vəziyyətə qarşı dirəniş və azadlıq mübarizəsi təbii olaraq meydana gəlmiş və zamanla Milli Azadlıq Hərəkatı şəklini almışdır.
Bu hərəkat, zaman-zaman coşmuş, zaman-zaman sarsıdılmış, lakin heç vaxt sönməmişdir. Lakin belə bir milli hərəkatın uğura çatması üçün təkcə fikir və istək kifayət etmir. Burada Milli Liderlik faktoru həlledici rol oynayır.
- Milli Lider Nədir və Niyə Lazımdır?
Milli lider yalnız təşkilatçı və ya tanınmış sima deyil. O, millətin ümumi iradəsini öz şəxsiyyətində və duruşunda təmsil edə bilən, təcrübəsi, cəsarəti və fədakarlığı ilə xalqın inamını qazanmış bir şəxsdir.
Güney Azərbaycan Milli Azadlıq Hərəkatında liderlik aşağıdakı səbəblərə görə həyati əhəmiyyət daşıyır:
Milli istiqamətin qorunması: Lider xalqı təxribat, sapmalar və düşmənin “kukla oyunları”ndan qoruyan mayakdır.
Təşkilatlanmanın mərkəzləşdirilməsi: Dağınıq təşəbbüslərin vahid strategiyaya çevrilməsi üçün liderlik şərtdir.
Xalqın motivasiyası və ruhunun gücləndirilməsi: Qorxunun yerini ümidə, dağınıqlığın yerini birlik ruhuna vermək liderin roludur.
- Güney Azərbaycanda Liderliyə Qarşı Hücumlar
Tehranın molla rejimi başda olmaqla, fars şovinizminin əsas məqsədlərindən biri azərbaycanlıların öz içindən lider çıxarmasına əngəl olmaqdır. Bu məqsədlə:
Təşkilatlara sızma və təxribat edilir,
Saxta alternativlər – yəni “kukla liderlər” xalqın qarşısına çıxarılır,
Milli liderlərə qarşı psixoloji, siyasi və informasiya müharibəsi aparılır.
Bu taktikanın məqsədi xalqın beynini qarışdırmaq, doğru ilə saxtanı ayıra bilməz vəziyyətə salmaq və hərəkatı liderliksiz buraxmaqdır.
- Dr. Mahmudəli Çöhreqanlı – Milli Liderlik Simvolu
Son illərdə Güney Azərbaycan hərəkatında xalqın yaddaşında və beynəlxalq aləmdə Dr. Mahmudəli Çöhreqanlı kimi simalar milli liderlik statusuna yüksəlmişdir. Çöhreqanlı, Tehran rejiminin məclisində xalqın dilini, haqqını müdafiə etdiyi üçün fiziki və siyasi təzyiqlərə məruz qalmış, amma əyilməmişdir. Onun:
Açıq, milli xətti,
Siyasi təcrübəsi,
Beynəlxalq çevrədə tanınması,
Güney və Quzeydə qazandığı etibar
onu milli iradənin təmsilçisi kimi ön plana çıxarmışdır.
Bu liderlik simvoluna qarşı aparılan kampaniyalar, əslində millətin öz liderini tapmasından duyulan qorxunun əlamətidir.
- Milli Liderliyin Ətrafında Birlik – Qurtuluşun Şərtidir
Güney Azərbaycan azadlığı yalnız “Facebook paylaşımları”, “şüarlar”, “reallıqdan uzaq romantizm” ilə gəlməyəcək. Liderliyin ətrafında vahid iradə ilə toplanmadan bu hərəkat nəticə verə bilməz.
Unutmayaq:
Bir millət təşkilatlanmadan var ola bilməz,
Təşkilatlanma isə liderlik olmadan qurula bilməz.
Hərəkatın içindəki hər bir şəxs, şəxsiyyət və təşkilat şəxsi eqo və maraqlarını bir kənara qoyaraq, millətin gələcəyini əsas götürməlidir. O gələcək isə yalnız liderlikli bir milli hərəkat ilə mümkündür.
Nəticə:
Güney Azərbaycan Türk milləti artıq qərarını verib: öz göbəyini özü kəsəcək. Bu tarixi prosesdə liderlik məsələsi yalnız bir taktiki deyil, strateji və varoluşsal məsələdir.
Hərəkatın uğuru, milli liderliyin tanınması, qorunması və onun ətrafında dəmir iradə ilə birləşməkdən keçir.
Yaşasın Güney Azərbaycan Milli Hərəkatı!
Yaşasın Güney Azərbaycan Türk Cümhuriyyəti!
Qarabağdan Təbrizə, Təbrizdən Ankaraya, birlik bizim gücümüzdür!
Rıza Qaraçay
