Bu gün Azərbaycanın siyasi tarixində ən mühüm şəxsiyyətlərdən biri, Azərbaycan Xalq Cümhuriyyətinin banisi, böyük mütəfəkkir və dövlət xadimi Məhəmməd Əmin Rəsulzadənin anadan olmasının 142-ci ildönümüdür.
ELAZ.İNFO xəbər verir ki, 1884-cü ilin 31 yanvarında Bakının Novxanı kəndində ruhani ailəsində dünyaya göz açan bu dahi şəxsiyyət, cəmi 71 illik ömrünə bütöv bir millətin azadlıq sevdasını sığdıra bilmişdir.
Təhsilini Sultan Məcid Qənizadənin müdir olduğu məktəbdə və Bakı texniki məktəbində alan Rəsulzadə, hələ 17 yaşında ikən (1902-ci il) Azərbaycanda rus müstəmləkəsinə qarşı gizli mübarizə aparan ilk siyasi təşkilatı — “Müsəlman gənclik təşkilatı”nı yaradaraq öz liderlik keyfiyyətlərini büruzə vermişdir. Onun qələmi yalnız publisistika üçün deyil, millətin oyanışı üçün bir silah idi.
1917-ci ilin gərgin siyasi atmosferində Rusiya parlamentinə millət vəkili seçilən Rəsulzadə, 1918-ci il mayın 27-də yaradılan Azərbaycan Milli Şurasının sədri oldu. Cəmi bir gün sonra, mayın 28-də onun rəhbərliyi altında Şərqdə ilk demokratik respublika — Azərbaycan Xalq Cümhuriyyəti elan edildi. 23 aylıq fəaliyyəti dövründə ADR həm ordusunu qurdu, həm ana dilini dövlət dili etdi, həm də qadınlara seçki hüququ verərək dövrünün ən mütərəqqi dövlətinə çevrildi.
1920-ci il aprelin 28-də sovet işğalından sonra vətəni tərk etməyə məcbur qalan Rəsulzadə, mühacirətdə olduğu illərdə də bir an belə olsun “Azərbaycan davası”ndan əl çəkmədi. Onun 1955-ci il martın 6-da Ankarada vəfat edərkən son sözünün üç dəfə “Azərbaycan!” olması, bu sevginin nə dərəcədə sonsuz olduğunun sübutudur.
Qeyd edək ki, Ümummilli Lider Heydər Əliyevin 1993-cü ildə imzaladığı fərman və cənab Prezident İlham Əliyevin 2023-cü ilin sonunda M.Ə.Rəsulzadənin 140 illik yubileyi ilə bağlı verdiyi Sərəncam, bu böyük şəxsiyyətin irsinin gələcək nəsillərə çatdırılmasında mühüm rol oynamışdır. Bu gün onun Novxanıdakı heykəli və adını daşıyan məkanlar xalqın ziyarətgahına çevrilib.
Ruslan MƏMMƏDOV
