ELAZ.İNFO xəbər verir ki, əmək bazarında şəffaflığın təmin edilməsi və vətəndaşların sosial müdafiəsinin gücləndirilməsi məqsədilə qeyri-formal məşğulluqla bağlı maarifləndirmə tədbirləri davam etdirilir. Ekspertlər xəbərdarlıq edir ki, əmək və ya xidməti müqavilə olmadan fəaliyyət göstərmək həm işçi, həm də dövlət üçün ciddi risklər yaradır. Mütəxəssislərin rəyinə əsasən, aşağıdakı hallar qeyri-formal məşğulluq hesab olunur:
Müqaviləsiz fəaliyyət: İşəgötürənlə işçi arasında hüquqi sənədin olmaması. Rəsmiləşdirilməyən sahibkarlıq: Sahibkarlıq fəaliyyətinin və ya mülkiyyətdə olan kənd təsərrüfatı torpaqlarının istifadəsinin qeydiyyata alınmaması. Uçota durmadan fəaliyyət: Yerli özünüidarəetmə orqanlarında qeydiyyatdan keçmədən ailə-kəndli təsərrüfatından qazanc əldə edilməsi. Qeyri-formal məşğulluq nəticəsində yaranan mənfi hallar zəncirvari təsirə malikdir: Hüquqların pozulması: İşçinin ödənişli məzuniyyət, xəstəlik vərəqəsi və gələcəkdə pensiya təminatı hüquqları itir. Məsuliyyətdən yayınma: İşəgötürən vergi, sosial sığorta və digər məcburi ödənişlərdən yayındığı üçün ciddi cərimələrlə üzləşə bilər. Aşağı məhsuldarlıq: Rəsmi münasibətlərin olmaması istehsalın keyfiyyətinin və əmək məhsuldarlığının aşağı düşməsinə gətirib çıxarır.
Əmək müqaviləsi sadəcə bir sənəd deyil, işçinin sabahına olan təminatıdır. Şəffaf əmək münasibətləri ölkə iqtisadiyyatının “kölgədən” çıxmasına və sosial rifahın artmasına birbaşa töhfə verir.
Ruslan MƏMMƏDOV
