ELAZ.İNFO xəbər verir ki, qlobal istiləşmə ilə mübarizədə elm dünyası ən böyük ümidini “yaşıl hidrogen” texnologiyasına bağlayıb. Artıq bir çox inkişaf etmiş ölkə neft və qazdan asılılığı azaltmaq üçün bu texnologiyanın tətbiqinə başlayıb.
Hidrogen enerjisinin ən böyük üstünlüyü onun yanması nəticəsində ətrafa zərərli tüstü deyil, yalnız təmiz su buxarının ayrılmasıdır. Bu, nəqliyyat və sənaye sahəsində karbon qazı emissiyasını sıfıra endirmək üçün ən effektiv yoldur.
Artıq dünyanın bir neçə ölkəsində hidrogenlə işləyən qatarlar və avtobuslar xəttə buraxılıb. Bu avtomobillər elektrik mühərrikli (EV) maşınlardan fərqli olaraq, cəmi 3-5 dəqiqə ərzində “yanacaqla” doldurulur və daha uzun məsafə qət edə bilir.
Qeyd edək ki, Azərbaycan da bu sahədə qlobal trendlərdən geri qalmır. Xəzər dənizinin külək enerjisi potensialı “yaşıl hidrogen” istehsalı üçün böyük imkanlar vəd edir. Ölkəmiz gələcəkdə Avropaya təkcə təbii qaz deyil, həm də təmiz hidrogen ixrac edən əsas mərkəzlərdən birinə çevrilməyi hədəfləyir.
Ruslan MƏMMƏDOV
