ELAZ.İNFO xəbər verir ki, Rusiya Elmlər Akademiyasının Kosmik Tədqiqatlar İnstitutunun alimləri Günəş səthində yeni bir “koronal dəlik” qeydə alıblar. Mütəxəssislərin proqnozuna görə, bu dəlikdən çıxan Günəş küləyi şənbə günü, martın 14-də Yerə çataraq geomaqnit dalğalanmalara səbəb olacaq.
Koronal dəliklər Günəş tacında temperaturun və plazma sıxlığının aşağı olduğu bölgələrdir. Buradan yüksək sürətli Günəş küləyi axınları kosmosun dərinliklərinə doğru püskürülür. Hazırda kosmosda nisbi sakitlik hökm sürür. Lakin 14 martdan etibarən vəziyyət dəyişə bilər. Alimlər bu gün üçün geomaqnit həyəcanlanma ehtimalını 20%, zəif qasırğa ehtimalını isə 7% qiymətləndirirlər. Şənbə günü bu rəqəmlərin artacağı gözlənilir. Fevralın 25-dən bəri ən güclü partlayış (C7.8 səviyyəsi) baş versə də, o, Günəşin sol kənarında lokallaşdığı üçün birbaşa Yerə təsir etməyəcək.
Koronal dəliklər ekstremal qəzalara səbəb olmasa da, müəyyən fəsadlar yarada bilir: Baş ağrıları, təzyiq dəyişikliyi və ümumi halsızlıq müşahidə oluna bilər. Yüksək dəqiqlikli naviqasiya cihazlarında kiçik fasilələr yarana bilər. Maqnit qasırğası nəticəsində daha aşağı enliklərdə belə qütb parıltısını müşahidə etmək mümkün olacaq.
ELAZ.İNFO xəbərdarlıq edir ki, maqnit qasırğası günlərində yuxu rejiminə diqqət etmək və həddindən artıq fiziki yükdən qaçmaq tövsiyə olunur.
Ruslan MƏMMƏDOV
