ELAZ.İNFO xəbər verir ki, kosmosun dərinliklərində elə hadisələr baş verir ki, onları təsəvvür etmək belə çətindir. Astronomların apardığı son tədqiqatlar sübut edir ki, Günəş sisteminin uzaq nəhəngləri olan Neptun və Uranda bildiyimiz su yağışları deyil, əsl almaz yağışları yağır. Bu qeyri-adi fenomen planetlərin ekstremal atmosfer təzyiqi və yüksək temperaturu ilə bağlıdır.
Bu planetlərin atmosferi əsasən hidrogen, helium və metan qazından ibarətdir. Alimlərin laboratoriya şəraitində apardıqları təcrübələr göstərir ki, planetin daxilinə doğru endikcə təzyiq o qədər artır ki, metan molekulları parçalanır. Bu zaman sərbəst qalan karbon atomları sıxılaraq almaz kristallaşmasına çevrilir. Yaranan almazlar minlərlə kilometr dərinlikdəki nüvəyə doğru sanki dolu dənələri kimi yağmağa başlayır.
Tədqiqatçılar hesab edirlər ki, bu “yağışlar” milyonlarla il ərzində planetlərin nüvəsi ətrafında nəhəng almaz təbəqələri yaradıb. Hətta bəzi fərziyyələrə görə, Neptunun mərkəzi hissələrində maye almazdan ibarət bütöv okeanlar mövcud ola bilər. Yer kürəsində ən nadir və bahalı daş hesab olunan almaz, bu uzaq dünyalarda ən adi təbiət hadisəsinin nəticəsidir.
Baxmayaraq ki, bu planetlərdəki “sərvət” insanın iştahını qabardır, oraya çatmaq və bu almazları toplamaq hələ ki, texnoloji cəhətdən qeyri-mümkündür. Neptun və Uranda hökm sürən dondurucu soyuq, nəhəng qravitasiya və dözülməz təzyiq hər hansı bir kosmik gəminin ora enməsini imkansız edir. Lakin bu kəşf bizə kainatın nə qədər zəngin və fərqli olduğunu bir daha göstərir.
Ruslan MƏMMƏDOV
