Avropanın ən nüfuzlu klub turniri olan Çempionlar Liqasında qrup mərhələsinin həlledici oyunları keçirilir. İngiltərə Premyer Liqası təmsilçiləri bu mərhələdə yüksək performans nümayiş etdirərək turnir cədvəlinin yuxarı sıralarında möhkəmləniblər.
ELAZ.İNFO xəbər verir ki, yanvarın 21-dən 22-nə keçən gecə baş tutan qarşılaşmalardan sonra İngiltərənin 5 klubu səkkizliyə düşmək üçün böyük şans qazanıb. “Arsenal” artıq növbəti mərhələni təmin etdiyi halda, “Liverpul” səfərdə “Marsel”i 3:0 hesabı ilə darmadağın edərək 4-cü sıraya yüksəlib. “Nyukasl” eyni hesabla PSV-ni məğlub edib, “Çelsi” isə “Pafos” üzərində minimal hesabla (1:0) qələbə qazanaraq ilk səkkizlikdəki yerini qoruyub.
Digər maraqlı nəticələr arasında “Bavariya”nın növbəti mərhələyə vəsiqəni rəsmiləşdirməsi və “Barselona”nın vacib qələbəsi yer alır. Hazırda yalnız “Mançester Siti” pley-off zonasında qalıb ki, onların da taleyi gələn həftə keçiriləcək oyunlardan asılı olacaq. “Liverpul”un kapitanı Vircil van Dayk oyundan sonra verdiyi açıqlamada hədəflərinin ilk səkkizlikdə qalmaq olduğunu bildirib.
Ruslan MƏMMƏDOV
