ELAZ.İNFO xəbər verir ki, bu gün Asiya bazarları Çindən gələn şok iqtisadi göstəricilərlə silkələnib. Rəsmi statistikaya görə, Çin 2025-ci ili 1,2 trilyon dollarlıq rekord xarici ticarət profisiti (artıqlığı) ilə başa vurub. Bu, dünya iqtisadiyyat tarixində bir ölkə üçün qeydə alınan ən yüksək rəqəmdir. Ekspertlər qeyd edir ki, ABŞ-ın tətbiq etdiyi ağır tariflərə baxmayaraq, Pekin öz ixracatını Cənub-Şərqi Asiya və Afrika bazarlarına yönəltməklə bu rekorda imza atıb.
Digər tərəfdən, Hindistanda mühüm diplomatik hadisə baş verib. ABŞ-ın yeni səfiri və eyni zamanda Cənubi və Mərkəzi Asiya üzrə xüsusi elçisi Sercio Qor bu gün Yeni Dehlidə etimadnaməsini təqdim edərək rəsmən fəaliyyətə başlayıb. Bu təyinat Vaşinqtonun Hindistanla müdafiə və yüksək texnologiyalar sahəsində əməkdaşlığı “yeni əsrə daşımaq” niyyətinin sübutu kimi qiymətləndirilir.
Cənub-Şərqi Asiyada isə İndoneziya və Birləşmiş Ərəb Əmirlikləri (BƏƏ) arasında süni intellekt və “yaşıl enerji” sahəsində nəhəng müqavilələr imzalanıb. Bu gün Abu-Dabidə keçirilən görüşlərdə İndoneziyanın regionda BƏƏ üçün əsas paylama mərkəzinə çevrilməsi razılaşdırılıb.
Ruslan MƏMMƏDOV
