ELAZ.İNFO xəbər verir ki, Londonun ICE birjasında keçirilən ticarət əməliyyatları zamanı “Brent” markalı neftin iyun fyüçerslərinin qiyməti 110 dollar həddini aşaraq 111,89 dollara çatıb. Bu, 30 mart 2026-cı ildən bəri qeydə alınan ən yüksək göstəricidir. Bazar məlumatlarına əsasən, neftin qiymətində artım sürəti 2,43%-ə qədər sürətlənib.
2026-cı ilin mart ayında “Brent” nefti 40%-dən çox bahalaşaraq iqtisadçıların diqqət mərkəzinə düşmüşdü. “Goldman Sachs” analitikləri qiymətlərin 100 dolları keçəcəyini əvvəlcədən proqnozlaşdırsalar da, hazırkı artım gözləntiləri də üstələyib. Bazar iştirakçıları neftin bahalaşmasını qlobal tədarük zəncirindəki gərginlik və geosiyasi faktorlarla əlaqələndirirlər.
Xatırladaq ki, ABŞ Prezidenti Donald Trampın İranla danışıqlara dair bəyanatları fonunda neft qiymətləri bir müddət əvvəl 14%-dən çox ucuzlaşmışdı. Lakin son saatlarda müşahidə olunan artım trendi göstərir ki, enerji bazarında qeyri-müəyyənlik davam edir. İnvestorlar Hörmüz boğazı ətrafındakı vəziyyəti və böyük ixracatçı ölkələrin qərarlarını yaxından izləyirlər.
Ruslan MƏMMƏDOV
