Bakı metrosunun xəritəsinə baxanda onun digərlərindən fərqləndiyini dərhal hiss edirik. Tunellərin dərinliyində deyil, günəş işığının altında yerləşən, özünəməxsus qrafiki ilə seçilən “Bakmil” stansiyasının bu gün — 25 sentyabrda açılışından tam 55 il ötür.
ELAZ.İNFO xəbər verir ki, 1970-ci ilin bu günündə istifadəyə verilən bu stansiya, əslində, sərnişinlər üçün nəzərdə tutulmamışdı. Bura “Nərimanov” elektrik deposunun bir hissəsi idi. Lakin ətrafdakı sənaye zonasında — o vaxtkı məşhur Məişət Kondisionerləri Zavodunda çalışan minlərlə işçinin gediş-gəlişini asanlaşdırmaq üçün burada platforma inşa edildi.
Stansiyanın ilk adı sadəcə “Depo” (və ya “Nərimanov Deposu”) idi. Lakin 1970-ci illərin sonunda Bakıda Azərbaycan-İtaliya müştərək müəssisəsi olan “Bakmil” (Bakı-Milan) zavodu fəaliyyətə başladıqdan sonra, 1979-cu ildə stansiyanın adı dəyişdirilərək indiki adını aldı. Bu ad həm də Bakının beynəlxalq sənaye əlaqələrinin rəmzi idi.Uzun müddət Bakı metrosunun yeganə yerüstü platforması olub.Bura qatarlar hər 2-3 dəqiqədən bir gəlmir. “Bakmil”ə getmək üçün platformadakı xüsusi cədvələ baxmalı və ya monitorlarda “Bakmil” yazısını gözləməlisən.Bu stansiyadan çıxanda insan özünü 80-ci illərin böyük sənaye Bakısında hiss edir.2018-2019-cu illərdə aparılan əsaslı təmirdən sonra stansiya tamamilə müasirləşdi. Köhnə sənaye havası modern şüşə və metal konstruksiyalarla əvəz olundu, platforması yeniləndi. Lakin onun o “spesifik” ab-havası və şəhər nəqliyyatındakı unikal rolu dəyişməz qaldı.Çoxları elə bilir ki, metronun bu hissəsi sadəcə texniki qatarlar üçündür, lakin “Bakmil” Bakı metrosunun ən çox strateji yük daşıyan nöqtələrindən biridir, çünki bütün qatarlar “yuxuya” məhz bu stansiyanın yanındakı depoya gedir.
Ruslan MƏMMƏDOV
