Paytaxtda müşahidə edilən yağıntılı və dumanlı hava şəraiti yollarda hərəkət təhlükəsizliyini ön plana çıxarıb. Xüsusilə magistral yollarda baş verə biləcək qəzaların qarşısını almaq məqsədilə operativ addımlar atılıb.
ELAZ.İNFO Daxili İşlər Nazirliyinin Nəqliyyatı İntellektual İdarəetmə Mərkəzinə (NİİM) istinadən xəbər verir ki, hazırda Zığ dairəsi – Hava Limanı yolunda bəzi zolaqlar üzrə maksimal sürət həddi 20 km/saat endirilib.
NİİM əməkdaşları tərəfindən yol kənarındakı elektron məlumat-sürət tablolarında dərhal dəyişiklik edilib. Sürücüləri məlumatlandırmaq üçün bütün tablolarda “sürüşkən yol” xəbərdarlıq işarəsi əks olunub. Yağışlı hava şəraitində görmə məsafəsinin azalması və yolun sürtünmə qabiliyyətinin aşağı düşməsi nəticəsində avtomobillərin idarəetmədən çıxma riski artır.
ELAZ.İNFO olaraq sürücülərdən xahiş edirik ki, müəyyən olunmuş yeni sürət həddinə ciddi əməl etsinlər, ara məsafəsini qorusunlar və kəskin manevrlərdən qaçsınlar. Unutmayın, sürət həddinin endirilməsi sizin və ətrafdakıların təhlükəsizliyi üçündür.
