ELAZ.İNFO xəbər verir ki, bu gün Tbilisi şəhərində regional nəqliyyat dəhlizləri üçün strateji əhəmiyyət kəsb edən mühüm sənədlər imzalanıb. Bakı–Tbilisi–Qars (BTQ) dəmir yolu xəttinin idarə edilməsini təkmilləşdirmək məqsədilə Azərbaycan Dəmir Yolları (ADY) və Gürcüstanın “Marabda-Kartsaxi Dəmir Yolu” MMC-nin törəmə müəssisələrinin təsis etdiyi “BTKI Railways” birgə müəssisəsinin tam fəaliyyətə keçməsi üçün hüquqi baza tamamlanıb.
Həyata keçirilən bu addım Orta Dəhlizin ən kritik seqmentlərindən biri olan BTQ-nin rəqabətqabiliyyətliliyini artırmağa xidmət edir. İmzalanan yeni razılaşmalar aşağıdakı əsas istiqamətləri əhatə edir. Marabda–Axalkalaki dəmir yolu infrastrukturundan birgə və səmərəli istifadə qaydaları müəyyən edilib. Axalkalaki stansiyasında beynəlxalq standartlara uyğun terminal xidmətlərinin göstərilməsi təmin olunacaq. Birgə müəssisə vasitəsilə vahid idarəetmə modelinin tətbiqi, yükdaşıma prosedurlarının sürətləndirilməsinə və logistik xərclərin optimallaşdırılmasına şərait yaradacaq.
Ekspertlərin fikrincə, “BTKI Railways”in fəaliyyətə başlaması regionun tranzit potensialını maksimum dərəcədə aktivləşdirəcək. Bu, həmçinin Şərq-Qərb istiqamətində hərəkət edən yük qatarlarının hərəkət vaxtını qısaldacaq və illik yükdaşıma həcmlərinin əhəmiyyətli dərəcədə artırılmasına imkan verəcəkdir.
Bu müqavilələr Azərbaycan və Gürcüstanın nəqliyyat-logistika sahəsindəki sarsılmaz əməkdaşlığının növbəti təzahürü kimi qiymətləndirilir.
Ruslan MƏMMƏDOV
