Yaxın Şərqdə təhlükəsizlik arxitekturasının dəyişdiyi bir mərhələdə ABŞ hərbçiləri Suriyanın şimal-şərqində saxlanılan yüksək rütbəli İŞİD üzvlərinin İraqa transferinə başlayıb. Bu addım bölgədəki həbsxanalardan kütləvi qaçış cəhdlərinin qarşısını almaq məqsədi daşıyır.
ELAZ.İNFO xəbər verir ki, ABŞ Mərkəzi Komandanlığı (CENTCOM) Suriyanın Həsəkə əyalətindən 150 İŞİD üzvünün İraqdakı “təhlükəsiz məkanlara” köçürüldüyünü təsdiqləyib. Məlumata görə, ümumilikdə 7 000-ə yaxın məhbusun İraq tərəfinə təhvil verilməsi planlaşdırılır. CENTCOM komandanı admiral Bred Kuper bildirib ki, bu transferlər İŞİD-in yenidən qruplaşmasının və bölgədə yeni xaos yaratmasının qarşısını almaq üçün kritik əhəmiyyət kəsb edir.
Transfer prosesi Suriya hökumət qüvvələrinin əvvəllər ABŞ-ın dəstəklədiyi Suriya Demokratik Qüvvələrinin (SDF) nəzarətində olan ərazilərə və düşərgələrə, o cümlədən məşhur “Əl-Hol” düşərgəsinə daxil olması ilə eyni vaxta təsadüf edir. İraq tərəfi gətirilən şəxslərin terror təşkilatının “birinci dərəcəli rəhbərləri” olduğunu və onların dindirildikdən sonra mühakimə olunacağını bəyan edib. Hazırda regionda gərginlik qalsa da, ABŞ və müttəfiqləri terror təhlükəsinin yayılmaması üçün İraq hökuməti ilə koordinasiyalı şəkildə fəaliyyət göstərir.
Ruslan MƏMMƏDOV
