ELAZ.İNFO Rusiyanın Fövqəladə Hallar Nazirliyinə (FHN) istinadən xəbər verir ki, Perm diyarında dağlıq ərazidə itkin düşən şəxslərlə bağlı faciəvi xəbər gəlib. Genişmiqyaslı axtarışlar nəticəsində üç nəfər aşkarlansa da, onlardan ikisi artıq həyatda deyil.
Rəsmi məlumatlara görə, cəsədlər Zolotanka kəndindən 30 km aralıda, Grob dağı yaxınlığında tapılıb. Şiddətli şaxta və çətin relyef şəraitində aşkarlanan şəxslərin donaraq öldüyü ehtimal edilir. Axtarışlar zamanı tapılan üçüncü şəxsin vəziyyəti çox ağırdır. O, şiddətli hipotermiya (donma) diaqnozu ilə təcili olaraq xəstəxanaya təxliyə edilir. Həkimlər onun həyatı üçün mübarizə aparırlar.
Hadisə yerində hazırda 68 nəfərdən ibarət xilasetmə qrupu və 59 ədəd texnika, o cümlədən 34 qar motosikleti fəaliyyət göstərir. Axtarışlara helikopter də cəlb olunub. FHN-in məlumatına görə, əvvəllər yardım çağırmaq üçün piyada gedən digər iki nəfərin də axtarışı davam etdirilir. Vəziyyət nəzarət altındadır, lakin çətin hava şəraiti axtarış işlərini ləngidir.
Ruslan MƏMMƏDOV
